Dangiang Dina Pamilihan Kepala Desa

PEMILIHAN Kuwu atawa Kepala Desa di Indonesia, teu sapinuhna rasional. Rea hal-hal mistis nu hirup dina proses demokrasi di tingkat desa ieu. Salianti soal ramalan-ramalan nu bakal meunang, tanda gambar, itung-itungan wedal para calon, tempat, jrrd, nu ngalibetkeun perdukunan, oge aya hiji hal nu sering ditalingakeun ku urang lembur, nyaeta soal dangiang.

Naon ari dangiang? Dangiang teh mangrupa hiji tanda biasana bentukna teh cahaya nu kaluar ti hiji tempat nu dianggap karamat di eta tempat, nu datang ka imah calon kepala desa. Biasana dangiang dipercaya datangna saminggu nepika maleman pamilihan kepala desa dilaksanakeun. Geus jadi kabiasaan di sababaraha daerah sok ngarintip dangiang dina maleman pamilihan kepala desa. Tempat nu dipilihna biasana ti tempat-tempat nu luhur nu awas ka mana-mana, utamana ka imah calon kepala desa.

Nurutkeun carita kolot, dangiang biasa bijil ti reupna peuting nepika jam 5 isuk-isuk. Kajadianana, aya cahaya bijil ti hiji karamat terus nuju ka imah calon kepala desa. Tapi cenah nu pangheulana dieuntreupan dangiang can puguh nubakal meunang. Sabab dangiang bakal euntreup sarta tumetep di imah calon nu bakal meunang. Remen kacaritakeun katangen dangiang sore keneh asup ka calon A, eh jam 5 an kaluar malah asup ka imah calon B. Atuh calon B dipercaya nu bakal meunang. Jadi dangiang dipercaya bakal ngalongok ka sakabeh calon tapi bakal tumetep di calon nu bakal meunang.

Dangiang dianggap mangrupakeun wibawa desa nu euntreup di calon kepala desa nu bakal meunang. Sajauh mana eta benerna, wallohu alam. Taya nu apal sacara pasti, tapi tetep dipercaya ku masarakat padesaan.Tapi isu dangiang dina pamilihan kepala desa memang bisa mangaruhan pilihan masarakat ka hiji calon. ***